Elstu nemendur 2026-2027

Í hópastarfinu á mánudögum (2021 J) og þriðjudögum (2021B) munu elstu börnin vinna markvisst að ýmsum stærðfræðitengdum verkefnum á meðan hinn hópurinn er í útikennslunni í skóginum. Við munum skoða og leika okkur með formin á ýmsan hátt, talningu og ýmis fjölda- og stærðarhugtök og stundum skrá niðurstöður og setja í möppu. Börnin fá líka að kynnast námsbókinni ,,Í talnalandi". 

Skiptinemaheimsóknir við GSS verða í október og mars en þá fáum við fyrstu bekkinga í heimsókn til okkar á meðan að hópur leikskólabarna dvelur í 1. bekk. 

Markmið 

• Að brúa bilið á milli skólastiganna og aðlaga börnin auknum kröfum í skólakerfinu, lengja úthald og einbeitingu.
• Að börnin læri að vinna saman í hópi jafnaldra.
• Að efla málvitund barna, auka orðaforða og málskilning.
• Að efla stærðfræðiþekkingu barnanna og talnaskilning þeirra.
• Að börnin læri vönduð og sjálfstæð vinnubrögð og öðlist lífsleikni.
• Að börnin læri að taka tillit hvert til annars, bíða, hlusta, tjá sig í hóp og fari eftir fyrirmælum
• Að börnin öðlist færni og öryggi í því að gera grein fyrir sér fyrir framan hóp.
• Að börnin læri að skrifa og þekkja nafnið sitt, helstu form og hugtök, tölustafi frá 1-5, og læri rétt blýantsgrip.

Leiðir

Í stundunum er lögð áhersla á fastar venjur í upphafi og enda stunda. Börnin setjast í hring, eftir að hafa dregið sér númer sem segir til um röðina, og eru boðin velkomin í stundina. Allir kynna sig, segja fullt nafn og síðar hvar þau eiga heima og hvenær þau eru fædd. Börnin læra að hlusta og virða rétt þess sem talar, þau vita að röðin kemur að þeim og þjálfast í því að tjá sig fyrir framan hóp. Verkefni dagsins er kynnt og farið með þuluna ,,Einn og tveir, inn komu þeir”. Þá setjast allir í sætin sín og vinna þau verkefni sem fyrir liggja hverju sinni. Ýmis hliðarverkefni eru höfð með á stöðvum til að efla skilning og áhuga barnanna. Við endum svo stundina á að haldast í hendur og þakka fyrir stundina.

Börnin vinna með sérvalin verkefni sem byggja mikið á leik, vinnu með form, tölur, talningu, ýmiskonar greiningu og flokkun, og eru til þess ætluð að æfa undirstöðuþætti bæði lestrar- og stærðfræðináms sem og nauðsynlega færniþætti. Námsáætlun þar sem áhersluatriði hverrar stundar er sett fram, er send út reglulega yfir veturinn og birt á heimasíðunni.

Markvisst er unnið að því að aðlaga börnin að flutningnum á næsta skólastig. Í haustbyrjun fara þau í heimsókn í grunnskólann, ásamt kennurum sínum, þar sem skólastjóri tekur á móti þeim og kynnir fyrir þeim starfsemina. Þau fara tvisvar yfir veturinn í ,,skiptinemaheimsóknir” í 1. bekk í hópunum, en hópur 1. bekkinga dvelur þá í leikskólanum á meðan. Kennarar þeirra eru ekki með í þeim heimsóknum, en undantekning er þó gerð ef börn þurfa á stuðningi að halda.

Ellý hefur umsjón með skipulagningu þessara verkefna ásamt hópstjórum og samskiptum við grunnskólann og verður með hópstjórunum í stundunum. 

Stundirnar eru hjá árgangi 2021, á mánudögum (Joanna) og þriðjudögum (Berglind Ósk) kl. 10:00, á móti útikennslunni.

Áhersluatriði í september-nóvember 2026.

31. og 1. Verkefni þar sem formin þríhyrningur, ferhyrningur og hringur eru kynnt. Börnin taka myndir af hvort öðru til þess að setja á forsíðu verkefnamöppunnar.

7. og 8. sept. Verkefnamappan útbúin a. gerð forsíða.

14. og 15. Unnið áfram með formin þríhyrning, ferhyrning og hring. M.a. smáhlutir flokkaðir á viðeigandi staði eftir lögun þeirra.

21. og 22 . sept. Áframhaldandi vinna með formin: Hvernig myndir er hægt að búa til úr formum.

28. sept og 29. sept. Talning – jafn margir, flestir, fæstir.

2. október. Hópur 2021J fer í heimsókn í 1. bekk frá 9-11 (Joönnu hópur)

5. og 6. okt. Færri en – fleiri en.

9. október. Hópur 2021B fer í heimsókn í 1. bekk frá 9-11 (Berglindar hópur)

12. og 13. okt. Unnið með ýmis stærðarhugtök s. stór-lítill, langur-stuttur.

19. og 20. október. Stærðarhugtök og talning

27. október. Náttfata- og Bangsadagurinn.

2. og 3. nóv. Stuttur-langur, langur-lengri-lengstur, lítill-minni-minnstur.

9. nóv. og 10. nóv. Röðun eftir stærð.

16. nóv. og 17. nóv. Talning og tölustafurinn 1 sérstaklega tekinn fyrir.

23. og 24. nóv. Talning og tölustafurinn 2 sérstaklega tekinn fyrir.

30. og 1. des. Talning og tölustafurinn 3 sérstaklega tekinn fyrir.

Vinnustundir í desember verða helgaðar jólunum og helgileiknum á litlujólunum.

Í október og mars verða skiptinemaheimsóknir í 1. bekk.

Þulan okkar: Tölurnar

Einn og tveir
inn komu þeir,
þrír og fjórir,
furðustórir,
fimm, sex, sjö og átta,
svo fóru þeir að hátta.
Níu, tíu, ellefu og tólf,
lögðu plöggin sín á gólf,
svo fóru þeir að sofa
og sína drauma lofa.
En um miðjan morgun
hún mamma vakti þá,
þrettán, fjórtán, fimmtán, sextán,
fætur stukku þeir á.
Svo fóru þeir að smala
suður fyrir á,
sautján, átján lambærnar
sáu þeir þá,
nítján voru tvílembdar
torfunum á,
tuttugu sauðirnir
suður við sel.
Teldu nú áfram
og teldu nú vel.